پٹنہ، 7/دسمبر (ایس او نیوز /ایجنسی) بہار میں خواتین، بزرگوں اور معذور افراد کے لیے خوشخبری کی امید پیدا ہو گئی ہے۔ بہار اسمبلی میں اپوزیشن لیڈر تیجسوی پرساد یادو نے آئندہ اسمبلی انتخابات سے پہلے ایک اہم سیاسی اعلان کرتے ہوئے کہا ہے کہ ان کی حکومت بننے پر خواتین، بزرگ شہریوں اور معذور افراد کو ہر ماہ 1500 روپے بطور پنشن فراہم کیے جائیں گے۔

تیجسوی یادو نے جمعہ کے روز راشٹریہ جنتا دل (آر جے ڈی) کے ذریعہ منعقدہ جنتا سمواد پروگرام کے دوران کہا کہ کئی ریاستوں میں خواتین کو یکمشت رقم مل رہی ہے۔ اب انہوں نے بہار میں بھی ایسا اعلان کیا ہے۔ انہوں نے کہا کہ وہ خواتین کو ہر ماہ 1500 روپے دیں گے۔ اگلے سال ہونے والے اسمبلی انتخابات کے حوالے سے اپوزیشن لیڈر کی طرف سے اسے ایک بڑا داؤ سمجھا جا رہا ہے۔

اپوزیشن رہنما نے کہا کہ اگر سال 2025 میں آر جے ڈی حکومت بنتی ہے تو تمام بوڑھے، معذور اور خواتین کو ہر ماہ 1500 روپے پنشن کے طور پر دیے جائیں گے۔ اس کے علاوہ ہر خاندان کو 200 یونٹ مفت بجلی دی جائے گی۔ مانا جا رہا ہے کہ اپنے اعلان کے ساتھ ہی تیجسوی نے اگلے سال ہونے والے انتخابات کے لیے اپنا پہلا قدم بڑھا دیا ہے۔ انہوں نے کہا کہ ان کی پارٹی 2025 کے انتخابات جیتے گی۔ ضمنی انتخاب کے نتیجے سے اہم انتخابات کے نتائج کا اندازہ نہیں لگایا جا سکتا ہے۔